zindagī gulshan meñ bhī dushvār hai tere baġhair
is chaman kā phuul bhī ik ḳhaar hai tere baġhair
zindagānī ishq kī nākāmiyoñ meñ sarf kī
zindagī kā lutf bhī dushvār hai tere baġhair
terī sūrat sāmne hotī to maiñ kahtā ġhazal
mujh pe zauq-e-shā.irī ik baar hai tere baġhair
sāqiyā jab tū nahīñ maiñ ne bhī chhoḌī mai-kashī
mai-kade se mai se bhī inkār hai tere baġhair
kis kī sūrat dekh kar paa.e qarār-o-chain dil
iid bhī 'siddīq' kī be-kār hai tere baġhair