guzarnā rahguzāroñ se baḌā āsān thā pahle
ilāqa ham jahāñ rahte haiñ vo sunsān thā pahle
sabab kyā hai use khone kā kuchh bhī ġham nahīñ hotā
jise paane kā is dil ko baḌā armān thā pahle
ye aalam hai ki ab kuchh bhī nahīñ ik hū kā aalam hai
hamāre ḳhāna-e-dil meñ koī mehmān thā pahle
bashar kā shar numāyāñ ho gayā daur-e-taraqqī meñ
yahī vo aadmī hai jo kabhī insān thā pahle
ajab ḳhushbū sī aatī hai dar-o-dīvār se ab bhī
yahāñ koī yaqīnan sāhib-e-īmān thā pahle
vo mere vāste ab jaan dene par hai āmāda
vahī 'jāved' jo merā harīf-e-jān thā pahle