pūchhā hī nahīñ us ne kabhī haal hamārā
bas yuuñ hī guzar jaatā hai har saal hamārā
rahtī hai ḳhabar saare zamāne kī hameñ bhī
phailā hai bahut duur talak jaal hamārā
mushkil hai kisī kaam kā honā bhī yahāñ par
ho jaatā hai har kaam ba-har-hāl hamārā
ham ne to numā.ish bhī lagā.ī nahīñ phir bhī
bāzār meñ chal jaatā hai har maal hamārā
pahchān zamāne se alag hī hai hamārī
miltā nahīñ har ek se sur-tāl hamārā
mumkin hai ki ban jaa.eñ shahanshāh-e-ġhazal ham
vaise to irāda nahīñ filhāl hamārā