lamhoñ ke ishāre meñ jafā dekh ke chup hai

kis vāste har ġham ko ḳhudā dekh ke chup hai

bādal kī riyāsat meñ sisaktā sā ujālā

shab-tāb kī ma.asūm ziyā dekh ke chup hai

dahshat ke havāle se pareshān kabhī thā

har shāḳh meñ ab phuul khilā dekh ke chup hai

sarsabz libāde meñ sajā.e thā jo sapnā

chehre kā abhī rañg uḌā dekh ke chup hai

dil-shād manāzir ke ahāte meñ zamāna

māyūs tasavvur ko khaḌā dekh ke chup hai

dastak kabhī tūfān kī pur-josh thī 'ja.afar'

bikhrī huī ḳhushbū kī ridā dekh ke chup hai