nigāh-e-husn kī tāsīr ban gayā shāyad
ḳhayāl-e-zehn meñ zanjīr ban gayā shāyad
vo ek naam jo tum ne miTā diyā hai abhī
jabīn-e-vaqt pe tahrīr ban gayā shāyad
mirī nigāh meñ nā-mo'tabar thā jis kā vajūd
vo fāsla mirī taqdīr ban gayā shāyad
ḳhud apnā chehra bhī ab to nazar nahīñ aatā
har aa.ina tirī tasvīr ban gayā shāyad
rah-e-ḳhulūs meñ fitrat thī jis kī mustahkam
vo sañg-e-mīl bhī rahgīr ban gayā shāyad