is iltifāt par koī dāman na thaam le

hai maslahat yahī ki taġhāful se kaam le

kuchh der kī ḳhushī se to behtar hai ġham mujhe

merī taraf na dekh na merā salām le

maiñ bhī to terī bazm meñ aayā huuñ der se

ab tū bhī mujh se ho ke ḳhafā intiqām le

jī bhar ke pahle apnī nazar se pilā mujhe

varna ye mai-kada le surāhī le jaam le

merī nigāh-e-shauq pe phir kījiyo nazar

pahle zarā ḳhud apne kaleje ko thaam le

mahfil meñ sab ke sāmne dād-e-ġhazal na de

yuuñ dil hī dil meñ shauq se lutf-e-kalām le

jis ne kabhī ḳhulūs bhī māñgā na ho tirā

is ahl-e-dil kā naam ba-sad-ehtirām le

jiine na deñge dekhne vaale kabhī hameñ

achchhā ye hai ki jabr-e-mohabbat se kaam le

hai dekhnā hī merī taraf to ba-ehtiyāt

mahfil meñ pahle jā.eza-e-ḳhās-o-ām le

terā huuñ aur terā rahūñgā tamām umr

lekin mire liye na koī ittihām le

milnā nasīb meñ hai to mil jā.eñge kabhī

jān-e-'shamīm' sabr-o-tahammul se kaam le