is se pahle ki kahānī se kahānī nikle

aa mire dil meñ utar aañkh se paanī nikle

itnī ujlat meñ talāshī nahīñ lī jā saktī

saañp ko hukm karo rāt-kī-rānī nikle

ḳhair kī saarī duāoñ kā bhalā ho laḌkī

ek bosa dam-e-ruḳhsat ki girānī nikle

is liye bhī ye badan khīñchnā paḌtā hai mujhe

jitne sikke the mire paas zamānī nikle

us pe mauqūf hai jo hukm ho dariyā dekhe

ret nikle yā tarā.ī meñ se paanī nikle