ā.īne se kab talak tum apnā dil bahlāoge
chhā.eñge jab jab añdhere ḳhud ko tanhā pāoge
aarzū armān ḳhvāhish justujū va.ade vafā
dil lagā kar tum zamānae bhar ke dhoke khāoge
har hasīñ manzar se yaaro fāsle qaa.im rakho
chāñd gar dhartī pe utrā dekh kar Dar jāoge
zindagī ke chand lamhe ḳhud kī ḳhātir bhī rakho
bhiiḌ meñ har-dam rahe to ḳhud bhī gum ho jāoge
us galī meñ jā rahe ho ishq hai rusvā jahāñ
soch lo phir soch lo pachhtāoge pachhtāoge