sub.h ke shor meñ nāmoñ kī farāvānī meñ

ishq kartā huuñ isī be-sar-o-sāmānī meñ

sūrmā jis ke kināroñ se palaT aate haiñ

maiñ ne kashtī ko utārā hai usī paanī meñ

sūfiya tum se mulāqāt karūñgā ik roz

kisī sayyāre kī jaltī huī uryānī meñ

maiñ ne añgūr kī beloñ meñ tujhe chuum liyā

kar diyā aur izāfa tirī hairānī meñ

kitnā pur-shor hai jismoñ kā añdherā 'sarvat'

guftugū ḳhatm huī jaatī hai jaulānī meñ