ye aañsū rok rakhe haiñ ba-mushkil din guzāre haiñ

tumheñ dikhte nahīñ haiñ jo sabhī vo ġham tumhāre haiñ

khulī zulfeñ hañsī chehra tumhārī jhiil sī āñkheñ

hameñ pāgal na kar deñ ye bahut dilkash nazāre haiñ

hamārī uñgliyoñ se aaj tak ḳhushbū nahīñ jaatī

kisī ke reshmī gesū kabhī itne sañvāre haiñ

kise vishvās hogā ham milan-taT chhū nahīñ paa.e

rahe nazdīk yuuñ jaise nadī ke do kināre haiñ

muhājir ho gayā huuñ dev kuchh majbūriyoñ ḳhātir

javāñ hone lage bachche bahut ḳharche hamāre haiñ