ab udaas phirte ho sardiyoñ kī shāmoñ meñ
is tarah to hotā hai is tarah ke kāmoñ meñ
ab to us kī āñkhoñ ke mai-kade mayassar haiñ
phir sukūn DhūñDoge sāġharoñ meñ jāmoñ meñ
dostī kā da.avā kyā āshiqī se kyā matlab
maiñ tire faqīroñ meñ maiñ tire ġhulāmoñ meñ
zindagī bikhartī hai shā.erī nikhartī hai
dilbaroñ kī galiyoñ meñ dil-lagī ke kāmoñ meñ
jis tarah 'sho.eb' us kā naam chun liyā tum ne
us ne bhī hai chun rakkhā ek naam nāmoñ meñ