Akhtar Muslimi

dil hi rah-e-talab mein na khona paDa mujhe

Akhtar Muslimi

Azamgarh, Uttar pradesh, India

1928-1989

dil rah-e-talab meñ na khonā paḌā mujhe

haath apnī zindagī se bhī dhonā paḌā mujhe

ik din meñ hañs paḌā thā kisī ke ḳhayāl meñ

tā-umr itnī baat pe ronā paḌā mujhe

ik baar un ko paane dil meñ thī aarzū

sau baar apne aap ko khonā paḌā mujhe

barbād ho gayā huuñ magar mutma.in hai dil

sharminda-e-karam to na honā paḌā mujhe

dekhī ga.ī na mujh se jo tūfāñ bebasī

kashtī ko apnī aap Dubonā paḌā mujhe

jalve kahāñ kisī ke bisāt-e-nazar kahāñ

zarre meñ āftāb samonā paḌā mujhe

'aḳhtar' junūn-e-ishq ke māroñ ko dekh kar

ahl-e-ḳhirad hañse haiñ to ronā paḌā mujhe

Top Urdushayar.com