vo abr sāya-fagan thā jo rahmatoñ kī tarah

kise ḳhabar thī navāzegā bijliyoñ kī tarah

us inqalāb kī dastak sunā.ī detī hai

jo bastiyoñ ko miTā degā zalzaloñ kī tarah

milā hai vo to lagā hai janam janam kā rafīq

bichhaḌ gayā thā jo bachpan ke sāthiyoñ kī tarah

mirī hai pyaas jo sahrā-ba-lab, sharar-ba-zabāñ

tumhārī aañkh hai gahre samundaroñ kī tarah

maiñ us ke qurb kī ḳhushbū se ban gayā huuñ gulāb

vo mere paas chahaktī hai bulbuloñ kī tarah

sitam-zarīf jajoñ ne hai 'saif' jhuThlāyā

hamāre ḳhuun ko jhūTī shahādatoñ kī tarah