kahīñ azaab kahīñ par savāb likhte haiñ
farishte roz hamārā hisāb likhte haiñ
bahut se log to aise bhī haiñ isī yug meñ
kitāb paḌhte nahīñ haiñ kitāb likhte haiñ
vo apne jism ke ḳhānoñ meñ aag rakhte haiñ
gulāb hote nahīñ haiñ gulāb likhte haiñ
yahāñ ke log to ta.abīr jānte hī nahīñ
ye apne niiñd meñ rahne ko ḳhvāb likhte haiñ
tumhāre zulm tumhāre sitam nahīñ likhte
ham apne aap kī qismat ḳharāb likhte haiñ