us par to kabhī dil kā koī zor nahīñ thā
ham sā bhī zamāne meñ koī aur nahīñ thā
jis vaqt vo ruḳhsat huā bārāt kī mānind
ik Tiis sī uTThī thī koī shor nahīñ thā
vīrān sī is duniyā meñ ham kis se bahalte
jañgal thā udāsī thī koī mor nahīñ thā
dil TuuT gayā thā to juḌāte kahīñ jā kar
is kaam kā duniyā meñ koī taur nahīñ thā
ḳhanjar kī chubhan se hī maiñ pahchān gayā thā
vo tū thā mire dost koī aur nahīñ thā