sahrā o shahr sab se āzād ho rahā huuñ
apne kahe kināre ābād ho rahā huuñ
yā husn baḌh gayā hai had se ziyāda us kā
yā maiñ hī apne fan meñ ustād ho rahā huuñ
is baar dil ke raste hamla karegī duniyā
sarhad banā rahā huuñ faulād ho rahā huuñ
chālāk kam nahīñ hai mahbūb hai jo merā
maiñ bhī sambhal sambhal kar farhād ho rahā huuñ
ruuh o badan barābar lafzoñ meñ Dhal rahe haiñ
ik tajrabe se maiñ bhī ījād ho rahā huuñ
thoḌā bahut mujhe bhī sunñe lagī hai duniyā
terī zabāñ se shāyad irshād ho rahā huuñ