dil ne fareb ishq meñ khaa.e kahāñ kahāñ
darmāndagī meñ ashk bahā.e kahāñ kahāñ
sajde kahāñ kahāñ na kiye rāh-e-shauq meñ
ka.abe qadam qadam pe basā.e kahāñ kahāñ
bazm-e-bahār-e-kunj-e-haram sehn-e-mai-kada
dīvāngī ne hashr uThā.e kahāñ kahāñ
har manzar-e-bahār meñ terā jamāl hai
vahshat sar-e-niyāz jhukā.e kahāñ kahāñ
āġhāz-e-ġham urūj-e-junūñ intihā-e-shauq
vo zindagī meñ yaad na aa.e kahāñ kahāñ
'maz.har' shab-e-firāq kī zulmat na dhul sakī
ham ne charāġh-e-dāġh jalā.e kahāñ kahāñ