ġhubār-e-dasht-e-yaksānī se niklā
ye rasta merī be-dhyānī se niklā
na ham vahshat meñ apne ghar se nikle
na sahrā apnī vīrānī se niklā
na niklā kaam koī zabt-e-ġham se
na ashkoñ kī farāvānī se niklā
na āñkheñ hī huiiñ ġharqāb-e-dariyā
na koī aks hī paanī se niklā
udhar niklī vo ḳhushbū shahr-e-gul se
idhar maiñ bāġh-e-vīrānī se niklā
huā ġharqāb shahr-e-jāñ to ye dil
ye dariyā apnī tuġhyānī se niklā
jo niklā shām-e-dasht-e-karbalā se
sitāra ḳhanda-peshānī se niklā