vaqt mazdūr hai ujrat diije

ek ik lamhe kī qīmat diije

mujh se ye bojh nahīñ uTh saktā

mashvara koī mujhe mat diije

hijr kī raat nahīñ Dhalne kī

ab charāġhoñ ko ijāzat diije

kaam kuchh dil ke haiñ kuchh duniyā ke

ik zarā sī mujhe mohlat diije

dil ko ābād hī karnā hai to phir

vahī dīvār vahī chhat diije

dil hai duniyā to nahīñ hai koī

jitnī chāhe ise vus.at diije

ḳhud bhī rakh sakte haiñ ham apnā ḳhayāl

kyā kisī aur ko zahmat diije