aage pīchhe us kā apnā saaya lahrātā rahā
ḳhauf se us shaḳhs kā chehra sadā piilā rahā
sub.h ko dekhā to vo mujh se thā bilkul ajnabī
raat bhar jo jism ke andar mujhe taktā rahā
kaisā dīvāna thā sab kuchh jaan kar anjān thā
har kisī se vo gale miltā rahā rotā rahā
ye ḳhatā merī thī tujh ko maiñ ne pahchānā nahīñ
ā.īne meñ jaane mujh ko kyā nazar aatā rahā
ḳhud-numā.ī ke liye tarkīb thī achchhī bahut
log sab ḳhāmosh the vo kuchh na kuchh kahtā rahā
ham ne dīvāroñ pe us ko kar diyā chaspāñ magar
apne ghar meñ vo baḌe ārām se soyā rahā
sab barhana-tan hue 'manzūr' jab mahfil kī jaañ
apne ghar meñ chhup ke ḳhāmoshī se maiñ baiThā rahā