ab kisī baat kā tālib dil-e-nāshād nahīñ

aap kī ain-ināyat hai ye be-dād nahīñ

aap sharmā ke na farmā.eñ hameñ yaad nahīñ

ġhair kā zikr hai ye aap kī rūdād nahīñ

dam nikal jā.egā hasrat hī meñ ik din apnā

sach kahā tum ne kuchh insān kī buniyād nahīñ

pahle naale ko sunā ġhaur se phir hañs ke kahā

aap kī saarī hī banāvaT hai ye fariyād nahīñ

ba.ad ustād ke hai ḳhatm ġhazal 'beḳhud' par

mo.ajaza kahiye ise tab-e-ḳhudā-dād nahīñ