abhī se tāq-e-talab par na tū sajā mujh ko

abhī to karnā hai is dil se mashvara mujh ko

abhī shabīh mukammal nahīñ huī terī

abhī to bharnā hai ik rañg-e-māvarā mujh ko

koī na koī to sūrat nikal hī aa.egī

zarā batāo to darpesh marhala mujh ko

ye baat baat pe takrār-o-bahs kyā karnā

ki jītnā hai tumheñ aur hārnā mujh ko

maiñ us kī zaat meñ shāmil thii, us ko mil jaatī

duā-e-ḳhair samajh kar vo māñgtā mujh ko

maiñ jis meñ dekh ke ḳhud ko sañvār luuñ 'nāhīd'

abhī milā hī kahāñ hai vo aa.inā mujh ko