us ke hisār-e-ḳhvāb ko mat karb-e-zāt kar
is ḳhushbū-e-ḳhayāl ko tū kā.enāt kar
dil kab talak judā.ī kī shāmeñ manā.egā
merī taraf kabhī to nasīm-e-hayāt kar
maiñ ik tavīl rāste par huuñ khaḌī huī
yā habs-e-tīrgī le yā hāthoñ meñ haath kar
dhīme suroñ meñ chheḌ ke phir sāz-e-zindagī
tū mere lahje meñ bhī kabhī mujh se baat kar
vo hijrateñ hoñ, hijr ho yā qissa-e-visāl
aa phir se mere naam sabhī vāqi.āt kar
pairoñ se us ke naam ke raste lipaT ga.e
ab to yaqīñ ke shahr meñ 'nāhīd' raat kar