vāhid parast ishq-ba-dāmāñ banā diyā

kāfir nazar ne ham ko musalmāñ banā diyā

ġhunche ko gul to gul ko gulistāñ banā diyā

zarre ko tū ne mehr-e-daraḳhshāñ banā diyā

ham the faqat farishta hī banñe pe mutma.in

ye hai ḳhudā kī den ki insāñ banā diyā

dil de ke dil ko lazzat-e-ġham de zahe nasīb

ḳhud dard hī ko dard kā darmāñ banā diyā

allāh junūn-e-ishq kī mojiz-numā.iyāñ

īmāñ ko kufr kufr ko īmāñ banā diyā

kis ne sameT kar ġham-e-kaunain ko 'sahar'

dil ko rahīn-e-sozish-e-pinhāñ banā diyā