shikva-e-daur-e-jām hai saaqī
zindagī tishna-kām hai saaqī
rok de gardish-e-zamāna ko
tere hāthoñ meñ jaam hai saaqī
fursat-e-sabr-o-ajr kis ko ho
zindagī tez-gām hai saaqī
mai kā piinā harām ho ki na ho
na pilānā harām hai saaqī
dar-haqīqat hayāt-o-maut abhī
qissa-e-nā-tamām hai saaqī
tālib-e-intiqām kyūñ-kar hoñ
umr ḳhud intiqām hai saaqī
aañkh milte hī kar diyā mad.hosh
ye tumhārā hī kaam hai saaqī
ham charāġh-e-'sahar' sahī lekin
mai-kade kī tū shaam hai saaqī