tamāsha ahl-e-mohabbat ye chār-sū karte

dil-o-dimāġh aur āñkheñ lahū lahū karte

vo raushnī se bharī jhiil ke kināre par

shikasta-rūh, darīda-badan rafū karte

hamāre baare meñ taftīsh karnā chāhte the

to jān-e-jān parindoñ se guftugū karte

jamāl-o-husn se labrez jab zamāna hai

tirī bisāt hī kyā terī aarzū karte

zamīñ pe chāñd sitāre bichhā ke ai 'hāshim'

falak pe phuul sajāne kī aarzū karte