sūratoñ ke shahr meñ rauzan hī rauzan dekh kar

ghar meñ aa baiThe kushāda ghar kā āñgan dekh kar

log Daale haiñ badan par fikr ke rañgīñ ġhilāf

ā.inoñ meñ shaḳhsiyat kā khurdurā-pan dekh kar

bad-gumāñ ahbāb hote haiñ to hone dījiye

baat kyuuñ ho fikr-o-fan kī rañg-o-roġhan dekh kar

ham chale the ḳhvāhishoñ kā tajziya karne magar

ruk ga.e haiñ īn-o-āñ kī tez dhaḌkan dekh kar

ab to vīrāna hī vīrāna hai shahr-e-dard meñ

kitne din royā kiye ḳhvāboñ kā madfan dekh kar

zehn tum ko jis taraf le jaa.e ai 'tanvīr' jaao

kyā karoge maslak-e-shaiḳh-o-barahman dekh kar