chehroñ ko to paḌhte haiñ mohabbat nahīñ karte

kyā log haiñ zaḳhmoñ kī himāyat nahīñ karte

zanjīr kī jhankār se ābād haiñ zindāñ

ham lazzat-e-guftār kī hasrat nahīñ karte

ḳhush-rañg ujāloñ kī barastī huī būñdeñ

girtī huī dīvār se nafrat nahīñ karte

patthar kī fasīloñ meñ unheñ nasb kiyā jaa.e

jo apnī rivāyat se baġhāvat nahīñ karte

vo merī talab ho ki tirā lams-e-badan ho

nashshe kabhī andāza-e-vahshat nahīñ karte