jalā huuñ dhuup meñ ik shahr-e-rañg-o-bū ke liye

milī hai tishna-labī sair-e-āb-e-jū ke liye

tire badan kī mahak ajnabī sahī lekin

mire qarīb se guzrī hai guftugū ke liye

junūñ kā paas vafā kā ḳhayāl husn kā ġham

ka.ī charāġh jale ek aarzū ke liye

na āñsuoñ ke sitāre na qahqahoñ ke gulāb

koī to jashn karo apne māh-rū ke liye

na.e savāl na.e tajarbe na.e chehre

hazār moḌ haiñ ik merī justujū ke liye