koī hamdam banā ke dekho tum
dil kī duniyā basā ke dekho tum
sub.h-e-nau phir se jaag jā.egī
shām-e-ġham ko sulā ke dekho tum
ban hī jā.egā vo guhar ik din
koī patthar uThā ke dekho tum
Duub jāoge merī chāhat meñ
mujh se nazreñ milā ke dekho tum
muskurānā adā sahī phir bhī
lazzat-e-ġham uThā ke dekho tum
rāh-e-ulfat meñ hārnā kaisā
ik diyā aur jalā ke dekho tum
husn par naaz hai bajā lekin
ishq ko aazmā ke dekho tum
ġhair hī se 'asar' tavaqqo kyuuñ
ḳhud ko apnā banā ke dekho tum