dasht-dar-dasht phirā kartā huuñ pyāsā huuñ maiñ
aur duniyā ye samajhtī hai ki dariyā huuñ maiñ
tañg sahrā nazar aayā hai jo phailā huuñ maiñ
ho ga.ī hai mirī tasvīr jo simTā huuñ maiñ
justujū jis kī safīnoñ ko rahī hai sadiyoñ
dosto mere vo be-nām jazīra huuñ maiñ
kis liye mujh pe hai ye sust-ravī kā ilzām
zindagī dekh le ḳhud terā sarāpā huuñ maiñ
aarzū mere qadam kī thī kabhī rāhoñ ko
aaj lekin dil-e-imkāñ meñ khaTaktā huuñ maiñ
paḌh sako gar to khuleñ tum pe rumūz-e-hastī
vaqt ke haath meñ ik aisā sahīfa huuñ maiñ
anjuman huuñ maiñ kabhī zaat se apnī 'shiblī'
aur mahfil meñ bhī rah kar kabhī tanhā huuñ maiñ