Alqama Shibli

zindagi se meri is tarah mulaqat hui

Alqama Shibli

Patna, Bihar, India

1928-2019
zindagī se mirī is tarah mulāqāt huī
lab hile aañkh milī aur na koī baat huī
dard kī dhuup nahīñ yaad kā saaya bhī nahīñ
ab to qismat merī be-rañgī-e-hālāt huī
sirf kal hī nahīñ is daur meñ bhī dīda-varī
nazr-e-auhām huī said-e-rivāyāt huī
kal to mehvar the mirī zaat ke ye kaun-o-makāñ
kā.enāt aaj jo simTī to mirī zaat huī
sar ko phoḌā kiye patthar se samundar se laḌe
sub.h yuuñ shaam huī shaam se yuuñ raat huī
ghar mirā dekh liyā sail-e-balā ne 'shiblī'
āgahī kyā huī ik dard kī sauġhāt huī
Top Urdushayar.com