zindagī se mirī is tarah mulāqāt huī

lab hile aañkh milī aur na koī baat huī

dard kī dhuup nahīñ yaad kā saaya bhī nahīñ

ab to qismat merī be-rañgī-e-hālāt huī

sirf kal hī nahīñ is daur meñ bhī dīda-varī

nazr-e-auhām huī said-e-rivāyāt huī

kal to mehvar the mirī zaat ke ye kaun-o-makāñ

kā.enāt aaj jo simTī to mirī zaat huī

sar ko phoḌā kiye patthar se samundar se laḌe

sub.h yuuñ shaam huī shaam se yuuñ raat huī

ghar mirā dekh liyā sail-e-balā ne 'shiblī'

āgahī kyā huī ik dard kī sauġhāt huī