maiñ rahūñgā diye ke saath yahāñ
kyā chaleñge havā ke haath yahāñ
koī aahaT sunā.ī detī hai
kaun rahtā hai mere saath yahāñ
marne vaalo palaT ke dekho zarā
kāTtā hai koī hayāt yahāñ
sātvīñ samt hai mujhe darkār
kam huī mujh pe shash-jahāt yahāñ
kis ne kholī hai merī almārī
maiñ ne rakkhe the kāġhzāt yahāñ
agle vaqtoñ meñ dil thā siine meñ
ab dhaḌaktī hai kā.enāt yahāñ
husn kī jiit par 'fidā' haiñ sabhī
ishq ko ho ga.ī hai maat yahāñ