mere a.asāb pe chhātī hī chalī jaatī hai

koī sūrat mujhe bhātī hī chalī jaatī hai

saañs dar saañs musāfir haiñ ġhubār-ālūda

zindagī ḳhaak uḌātī hī chalī jaatī hai

kaun kartā hai samā.at ke taqāze puure

ḳhāmushī shor machātī hī chalī jaatī hai

dekh ashkoñ kā samundar hai mire chāroñ taraf

mauj-e-ġham mujh ko bahātī hī chalī jaatī hai

tīrgī hai ki bhaTaktī hai tirī galiyoñ meñ

raushnī raah dikhātī hī chalī jaatī hai

mere sab zaḳhm haiñ naqqād mire sheroñ ke

shā.irī hashr uThātī hī chalī jaatī hai

rokne vaale mujhe rokte rahte haiñ 'fidā'

shā.irī aage baḌhātī hī chalī jaatī hai