ḳhaak thī ḳhāk-dān meñ kyā thā

ham se pahle jahān meñ kyā thā

jaañ hathelī pe thī patañgoñ kī

jaane is sham.a-dān meñ kyā thā

ab to aaseb hai mire ghar meñ

qabl is ke makān meñ kyā thā

khīñchtā thā vo naqsh-e-pā ham ko

naqsh kyā thā nishān meñ kyā thā

devtā kah rahe the log jise

vo hamārī zabān meñ kyā thā

umr bhar mil sake na ham donoñ

vasvasa darmiyān meñ kyā thā

kaisā niklā hai ai 'fidā' tū bhī

aur hamāre gumān meñ kyā thā