us se taslīm bas yūñhī sī hai
barf ehsās kī jamī sī hai
chaliye ahbāb ko to jaan ga.e
ye musībat to aarzī sī hai
kuchh to chāragarī kare koī
aaj kuchh dard meñ kamī sī hai
aaj chupke se kis kī yaad aa.ī
dil ke āñgan meñ chāñdnī sī hai
kis ne tark-e-vafā kiyā pahle
ye shikāyat bhī bāhamī sī hai
hasrato ab to ho chalo ḳhāmosh
nabz bīmār kī thamī sī hai
umr guzrī jise bayāñ karte
vo kathā ab bhī an-kahī sī hai