peḌoñ se dhuup pichhle-pahar kī phisal ga.ī
sūraj ko ruḳhsatī kā ufuq se payām hai
phailā huā hai kamre meñ ehsās-e-be-hisī
ḳhāmoshiyoñ se be-suḳhanī ham-kalām hai
aahaT ho qufl khulne kī darvāza baaz ho
āñkhoñ ko ab yaqīñ hai ye ummīd-e-ḳhām hai
ye umr-e-sust-gām guzartī hai is tarah
har aan dil ko vaqt-shumārī se kaam hai
rahtī hai sirf us se tasavvur meñ guftugū
ārām-gāh-e-rūh meñ jis kā maqām hai
vo ham-safar jo chhoḌ ke aage chale ga.e
ai mauja-e-havā unheñ merā salām hai
har ik ko nā-guzīr huī dāvat-e-fanā
Thahrāv hai sahar ko na shab ko davām hai
haiñ an-kahe bahut se suḳhan-hā-e-guftanī
afsāna-e-hayāt sadā nā-tamām hai
din jā rahā hai jaise judā ho rahe haiñ dost
kaisī bujhī bujhī sī ye garmī kī shaam hai