dil pe yādoñ kā bojh taarī hai
aaj kī raat kitnī bhārī hai
qaid kī tarah kāTte haiñ sab
kis ne ye zindagī guzārī hai
sar chhupā kar tire dupaTTe meñ
ḳhushbuoñ ne thakan utārī hai
aisī bhīnī mahak hai bātoñ meñ
jaise taaza guloñ kī kyārī hai
dil-lagī lamha-bhar kī hai lekin
zindagī-bhar kī be-qarārī hai
zulf-o-ruḳhsār kī ziyā le kar
ham ne apnī ġhazal sañvārī hai
chaah par kis kā zor hai ai 'atīb'
chaah to ġhair iḳhtiyārī hai