un kā ḳhayāl har taraf un kā jamāl har taraf
hairat-e-jalva rū-ba-rū dast-e-savāl har taraf
mujh se shikasta-pā se hai shahr kī tere aabrū
chhoḌ ga.e mire qadam naqsh-e-kamāl har taraf
ham haiñ javāñ bhī piir bhī ham haiñ adam bhī ziist bhī
ham haiñ asīr-e-halqa-e-qaul-e-muhāl har taraf
naġhma girā hai buuñd buuñd phir bhī uThī hai kitnī guuñj
uḌtī phire hai zehn meñ gard-e-ḳhayāl har taraf
qalb-e-hayāt-o-maut se mil na sakā koī javāb
pheñkā kiye haiñ garche ham sañg-e-savāl har taraf