is vaqt apne tevar puure shabāb par haiñ
saare jahāñ se kah do ham inqalāb par haiñ
ham ko hamārī nīndeñ ab chhū nahīñ sakeñgī
jis tak na niiñd pahuñche us ek ḳhvāb par haiñ
un qātiloñ ke chehre ab to ughāriyegā
taaza lahū ke dhabbe jin ke naqāb par haiñ
apnī laḌā.ī hai to keval usī mahal se
apne lahū kī būñdeñ jis ke gulāb par haiñ
kaise miTā sakegā ham ko 'kuñvar' zamāna
ham dastaḳhat samay ke dil kī kitāb par haiñ