do-chār baar ham jo kabhī hañs-hañsā liye
saare jahāñ ne haath meñ patthar uThā liye
rahte hamāre paas to ye TūTte zarūr
achchhā kiyā jo apne sapne churā liye
chāhā thā ek phuul ne taḌpeñ usī ke paas
ham ne ḳhushī se peḌoñ meñ kāñTe bichhā liye
āñkhoñ meñ aa.e ashk ne āñkhoñ se ye kahā
ab roko yā girāo hameñ ham to aa liye
sukh jaise bādaloñ meñ nahātī huuñ bijliyāñ
dukh jaise bijliyoñ meñ ye bādal nahā liye
jab ho sakī na baat to ham ne yahī kiyā
apnī ġhazal ke sher kahīñ gungunā liye
ab bhī kisī darāz meñ mil jā.eñge tumheñ
vo ḳhat jo tum ko de na sake likh-likhā liye