pyāse hoñToñ se jab koī jhiil na bolī bābū-jī
ham ne apne hī aañsū se aañkh bhigo lī bābū-jī
phir koī kaalā sapnā thā palkoñ ke darvāzoñ par
ham ne yuuñ hī Dar ke maare aañkh na kholī bābū-jī
bhūle se jāne-anjāne vaar na karnā tum un par
jin jin ke kandhoñ par hai ye priit kī Dolī bābū-jī
ye mat pūchho is duniyā ne kaun se ab tyauhār diye
dī ham ko andhī dīvālī ḳhuun kī holī bābū-jī
dil nikle hī mehnat ke ghar haath jo ham ne bheje the
vo hī ḳhālī le kar lauTe shaam ko jholī bābū-jī
ham par kitne zulm hue haiñ kaun batā.e duniyā ko
bandūqoñ meñ baaqī hai kyā ek bhī golī bābū-jī
vo bhī apnī āñkhoñ meñ nāḳhūn hī le kar baiThe the
dikhne meñ jin kī sūrat thī bahut hī bholī bābū-jī
ye kah kah kar kal ham ko saarī ḳhushiyāñ mil jā.eñgī
karte rahte ho kyuuñ ham se roz ThiTholī bābū-jī
us meñ kuchh TuuTe sapne the kuchh aaheñ kuchh aañsū the
jab jab bhī ham ne ye apnī jeb TaTolī bābū-jī
ab kī baar to rākhī par bhī bhī de na sakī kuchh bhayyā ko
ab us ke suune māthe par sirf hai rolī bābū-jī