ziist ke bhed kholtā hai kaun
mere andar ye boltā hai kaun
mere sheroñ meñ mere lafzoñ ko
motiyoñ sā ye roltā hai kaun
mere sheroñ meñ merī ġhazloñ meñ
apne asrār kholtā hai kaun
talḳh lamhoñ meñ lab se shīrīnī
mere kānoñ meñ gholtā hai kaun
chhīn lī kis ne merī tanhā.ī
merī rātoñ meñ Doltā hai kaun
kund ho jaatā hāfiza merā
us ko har pal TaToltā hai kaun
sher mere nahīñ haiñ ye 'hairat'
ḳhud samajh lo ye boltā hai kaun