mere dil meñ ghar bhī banātā rahtā hai
aur dil par nashtar bhī chalātā rahtā hai
dushman kī bātoñ meñ aa kar bhaa.ī mirā
sab se jaane kyā kyā kahtā rahtā hai
detā hai paiġhām-e-mohabbat duniyā ko
ḳhud nafrat kī aag lagātā rahtā hai
bhaa.ī mirā jo paikar thā hamdardī kā
raah meñ merī ḳhaar bichhātā rahtā hai
gum-sum us kī yaad meñ rahtā hai aksar
āñkhoñ se vo ashk bahātā rahtā hai
vo to ḳhud ik pyāsā hai shāhid 'ġhāzī'
phir bhī sab kī pyaas bujhātā rahtā hai