dard kam hone lagā aao ki kuchh raat kaTe

ġham kī mī.ād baḌhā jaao ki kuchh raat kaTe

hijr meñ āh-o-bukā rasm-e-kohan hai lekin

aaj ye rasm hī doharāo ki kuchh raat kaTe

yuuñ to tum raushnī-e-qalb-o-nazar ho lekin

aaj vo mo.ajiza dikhlāo ki kuchh raat kaTe

dil dukhātā hai vo mil kar bhī magar aaj kī raat

isī be-dard ko le aao ki kuchh raat kaTe

dam ghuTā jaatā hai afsurda-dilī se yaaro

koī afvāh hī phailāo ki kuchh raat kaTe

maiñ bhī be-kār huuñ aur tum bhī ho vīrān bahut

dosto aaj na ghar jaao ki kuchh raat kaTe

chhoḌ aa.e ho sar-e-shām use kyuuñ 'nāsir'

use phir ghar se balā laao ki kuchh raat kaTe