terī zulfoñ ke bikharne kā sabab hai koī

aañkh kahtī hai tire dil meñ talab hai koī

aañch aatī hai tire jism kī uryānī se

pairahan hai ki sulagtī huī shab hai koī

hosh uḌāne lagīñ phir chāñd kī ThanDī kirneñ

terī bastī meñ huuñ yā ḳhvāb-e-tarab hai koī

giit buntī hai tire shahr kī bharpūr havā

ajnabī maiñ hī nahīñ tū bhī ajab hai koī

liye jaatī haiñ kisī dhyān kī lahreñ 'nāsir'

duur tak silsila-e-tāk-e-tarab hai koī