kyā banā.e sāne-e-qudrat ne pyāre haath paañv

nuur ke sāñche meñ Dhāle haiñ tumhāre haath paañv

zo.af-e-pīrī chhā gayā zor-e-javānī chal basā

ab chaleñ batlā.īye kis ke sahāre haath paañv

machhliyāñ baazū pe ubhrīñ sāq-e-pā sham.eñ banīñ

ḳhuub sāhab ne nikāle ab to baare haath paañv

fauq hiire se nahīñ hai merī jaañ yāqūt ko

kyuuñ rañge haiñ aap ne mehñdī se saare haath paañv

mānī-o-bahzād ne mulk-e-adam kī raah lī

vo kamar mutlaq na paa.ī laakh maare haath paañv

ham na kahte the ki har dam shoḳhiyāñ achchhī nahīñ

āḳhirash mehñdī ne bāñdhe lo tumhāre haath paañv

hāthā-pā.ī meñ bhī ham chūke na apne kaam se

vasl kī shab yaar ne kyā kyā na maare haath paañv

hai za.īfī meñ bhī ham ko naujavānī kā ḳhayāl

dil nahīñ haarā hai ab tak go ki haare haath paañv

ġhair kī dhamkī se ham Dar jaa.eñ ye mumkin nahīñ

aise buude bhī nahīñ haiñ kuchh hamāre haath paañv

ma.adan-e-yāqūt ko dariyā banāyā aap ne

mehñdī mal kar dho.e jab dariyā kināre haath paañv

is buḌhāpe meñ bhī 'āġhā' so javāñ meñ ek hai

go za.īfī aa ga.ī par haiñ karāre haath paañv