maiñ bā-vafā hī rahā rah ke be-vafāoñ meñ

gul-e-bahār kī sūrat khilā ḳhizāoñ meñ

bharī bahār meñ dekhe jo phuul jalte hue

ruke na ashkoñ ke dariyā mirī ghaTāoñ meñ

hamāre hāthoñ se jab vaqt kī girah na khulī

to log samjhe ki ham ḳhush haiñ ibtilāoñ meñ

tire huzūr rahī qahqahoñ pe pābandī

rahā hai ḳhauf bhī raqsāñ mirī sadāoñ meñ

karo na saarī mukaddar fazā jahāñ vaalo

mire bhī hisse kī sāñseñ haiñ in havāoñ meñ

ḳhulūs kī na chalī ek bhī yahāñ 'ashraf'

gañvāyā vaqt abas ham ne iltijāoñ meñ