Mushtaq Anjum

teri ulfat ko jaga rakkha hai

Mushtaq Anjum

Howrah, West Bengal, India

1955
terī ulfat ko jagā rakkhā hai
dil meñ tūfān uThā rakkhā hai
rañj-o-rāhat haiñ gile-shikve haiñ
kaisā ghar-bār sajā rakkhā hai
us kā ehsān ki us ke dil ne
fāsla ham se sadā rakkhā hai
vaqt kyuuñ ret sā phislā jaa.e
ham ne muTThī meñ dabā rakkhā hai
sāmne rahte hue bhī us ne
ḳhud ko parde meñ chhupā rakkhā hai
shaad har pal haiñ ki ham ne dil ko
ḳhūgar-e-dard banā rakkhā hai
ḳhaar hai jis kī zabāñ us ne bhī
ghar ko phūloñ se sajā rakkhā hai
koī jumbish pas-e-parda ho kabhī
sar tire dar se lagā rakkhā hai
vo bhī kyā dil hai ki jis meñ 'anjum'
naam rakkhā na patā rakkhā hai
Top Urdushayar.com